Mag-uuma ug mananagat may insurance na

CEBU, Philippines - Nadawat na sa mga mag-uuma ug mga mananagat sa 11 ka lungsod sa amihanang bahin sa lalawigan sa Sugbo ang ilang certificate of insurance alang sa ilang kaugalingon ug sa ilang abot ug binuhi nga kahayupan.

Kapin sa usa ka libo ka mag-uuma ug mga mananagat ang nalakip sa unang hugna nga gihatagan og insurance sa Kapitolyo ug Philippine Crop Insurance Corporation atol sa kalihukan nga gipahigayun sa lungsod sa San Remegio kagahapon.

Ang kalihukan gitambungan mismo ni Gobernador Gwendolyn Garcia, Kongresista Benhur Salimbangon, PCIC President Jovy Bernabe, Department of Agriculture 7 Director Leo Cañeda, mga mayor ug ubang lokal nga opisyal.

Kagahapon usab gitunol sa PCIC ang P67,500 nga bayad sa namatay nga kabayo nga iya sa Kapitolyo.

Matud pa ni Cañeda nga ang lalawigan sa Sugbo maoy nag-una sa tibuok nasud nga gihatagan og insurance ang mga mag-uuma ug mga mananagat.

Matud pa usab ni Garcia nga maayo nalang nga ang mga mag-uuma adunay mapaabot sa higayun nga ang ilang tanum sa kaumahan masugamak sa kalamidad ug kaha madisgrasya sa ilang trabaho ilabi na sa mga mananagat.

Ang Kapitolyo maoy mibayad sa premium ngadto sa PCIC ug tinguha niini nga makapa-enrol og 35 mil ka mga mag-uuma ug mga mananagat niining tuiga.

Sa P35 matag usa, ang PCIC mohatag og P50 mil nga insurance ug P5,000 nga medical ug burial assistance.

Ang mga lungsod nga nalakip sa unang hugna mao ang Balamban, Asturias, Tabuelan, San Remegio, Bantayan, Santa Fe, Madridejos, Daanbantayan, Medellin, Borbon ug Tabogon. (BANATNEWS)