CEBU, Philippines - Nakaangkon og grabeng kadaot ang ulo sa usa ka 7-anyos nga batang lalaki human kini mahagbong gikan sa ikatulong andana sa ilang tunghaan sa Capitol Hills, barangay Kalunasan, dakbayan sa Sugbo niadtong Martes sa hapon.
Ang biktima mao si Cliff Booc, pupil sa grade one sa Lyceum of Cebu Inc. Cebu CFI Coop Learning Center.
Si PO1 Michael Baring, duty desk officer sa Guadalupe Police Station mibutyag nga nadawat nila ang report gikan sa Cebu Provincial Police Office (CCPO) sa alas 4:45 sa hapon sa nahisgutang adlaw.
Apan sumala ni Baring nga nahagbong ang bata atol sa lunch break dihang nagduwa-duwa ang biktima didto sa ika-tulong andana.
Wala hinuon ikabutyag sa kapolisan ang hinungdan sa paghagsa sa bata ngadto sa ubos.
Gumikan niini ang kagamhanan sa barangay ug ang administrasyon sa maong tunghaan misaad og tabang ngadto sa pamilya sa biktima kinsa naa karon sa Cebu Doctors Hospital.
Ang mga magtutudlo sa maong tunghaan nagpahigayon dayon og emergency meeting human sa insidente ug gituki ang bahin sa nahitabo. (BANAT)