CEBU, Philippines - Gilibkas na sa Maritime Industry Authority (MARINA)7 ang suspension order sa duha ka barko sa Island Shipping Corporation human kini makapasar sa gipahigayong re-inspection.
Gibutyag ni manlalaban Jose "Jojo" Cabatingan, tigpamaba sa MARINA 7 nga sugod kagahapon sa buntag gitugotan nang makabeyahi ang M/V Island Roro-1 ug ang M/V Island LCT-2.
Matud ni Cabatingan ang Roro-1 nasuta nga walay deperensiya tungod kay duha pa ka semana kini gikang gi -dry dock samtang ang LCT-2 bag-o kining barko sa kompanioya nga napalit niadto pang Abril niining tuiga.
Ang duha ka barko didto hilinga sa team sa MARINA-7 pinangulohan ni Engr. Rico Magsalay sa Hagnaya wharf niadtong miaging hapon human mogawas nianang adlawa ang suspension order.
Satang gibutyag ni CAbatingan nga ang barkong M/V Island Express-2 sa mao gihapong kompaniya pabilin pang gisuspenso karon human masuta nga may mga gagmay kining depekto nga gipakurihi-an una sa kompaniya.
Hinoon sa paghimo ning balita nagpadayon pa ang mga opisyal sa MARINA-7 sa paghiling sa 3 pa ka barko sa maong kompaniya nga mao ang M/V Super Island Express-1, M/V Lct Island Express-2 ug M/V Island Express-5.
Samtang gihangop ni Alex Tan, tag-iya sa Island shipping ang dinaliang pag-inspection ug paglibkas dayon sa suspension order sa duha niini ka barko.
Matud ni Tan atol sa interview sa Tingog sa Lungsod program sa Bantay Radyo nga bisan og suspendido ang mga biyahe sa ilang barko apan padayon niyang gi-sweldohan ang mga kawani niini aron pagtubag sa inadlaw-adlaw nilang panginahanglan.
Dugang pa ni Tan nga gi-asikaso na usab nila ang tanang ayuda ngadto sa duha ka pasahero ug usa ka chiefmate sa pagkasunog ug pagkalunod sa M/V Island Express Fast Craft-1.
Gawas niini gipahibawo ni Tan nga ila usab nga gihatagan og tag P3 mil nga hinabang ang matag usa nga pasahero.
Giklaro ni Cabatingan nga ang maong panghitabo usa lang gyud ka aksidente ug sa pagkakaron nagpadayon pa ang imbistigasyon sa giumol nga team sa ilang buhatan ug sa Philippine Coast Guard. (BANAT)