VSMMC gidayeg ni Cong. Garcia

CEBU, Philippines - Gidayeg ni Governor Gwendolyn Garcia ug sa iyang igsuon nga si 3rd district Congressman Pablo John “PJ” Garcia ang dali nga pag-atiman sa mga medical staff sa Vicente Sotto Memorial Medical Center (VSMMC) sa mga biktima sa    pagkatagak sa trak de karga sa lupot didto sa barangay Balao, lungsod sa Barili sa miaging Huwebes.

Matud pa   sa   gobernador   nga wala magkwenta sa oras ang mga doktor nga   miatiman sa mga pasyente aron lamang maluwas ug sila  maoy labing unang nakapahimulos sa Trauma Center sa sulod sa VSMMC. Ang mga pagdayeg sa gobernador ug    sa igsoon niining magbabalaod   ilang gitunol ngadto    kang Dr. Gerardo Aquino, ang hepe sa VSMMC

Gani matud pa ni   Kongresista Garcia nga nakasaksi gyud siya sa pag-atiman sa mga doktor sa VSMMC hinungdan nga naghuot ang mga medical staff nga mitabang sa mga angol niadtong adlaw nga Huwebes.

Sa bahin ni Dr. Aquino   kini nagkanayon nga ilang gihimo kutob sa ilang mahimo ang pagluwas sa mga angol nga gani mi-report sa trabaho bisan kadtong kawani nga nag-day-off sa maong adlaw.

Nasayran nga ang   bag-ong   nahuman nga Trauma Center   sa VSMMC maoy dad-anan sa mga pasyente nga nagkinahanglan sa dinaliang pag-atiman ug didto nakita ang ka-epektibo sa maong pasilidad.

Gumikan sa   kaabtik nga gipakita sa mga kawaning mananambal sa VSMMC nasalbar ang tanang angol sa trahedya sa Barili.

Sa maong hitabo 10 ang namatay diha-diha samtang 50  ang naangol dihang    naligid ngadto sa lupot ang trak de karga nga ilang gisakyan dala ang minatay nga gisulod sa lungon aron unta ilang ilubong sa menteryo munisipal sa Barili niadtiong higayona.  - BANAT NEWS