Obenza wa gihapon kasumiter og cyber sex report

CEBU, Philippines - Misamot og kasagmuyo si Lapulapu City mayor Paz Radaza sa hepe sa kapolisan sa dakbayan nga si Sr. Supt. Anthony Obenza tungod sa kapakyas niini pagsumiter sa iyang report kalabot sa gibutyag niining operasyon sa cyber sex operation sa tulo ka barangay sa dakbayan.

Nunot niini ang mga sakop nalang sa Barangay Peacekeeping Action Team (BPAT) kun mga tanod ug social welfare officers maoy gisangunan ni Radaza sa pagtrabaho sa unta trabaho sa kapolisan.

Si Obenza unang mibutyag nga adunay cyber sex sa barangay Buaya, Basak ug Marigondon nga gidudahan sa mayor nga walay kamatuoran.

`Sa pasiunang taho sa social welfare officers ug BPAT ngadto ni Radaza negatibo na kini ug kun duna man miundang na sa maong negosyo.

Bisan pa sa maong taho si Mayor Radaza padayon nga mimando sa iyang mga sakop nga monitoron ang ubang mga barangay nga adunay mga internet café ug nagtiner ug mga personal computers.

Hangtod ning panahona nagpaabot lang gihapon ang Mayor sa maong report ni Obenza ug nanghinaut kini nga adunay masikop nga nalambigit sa maong illegal nga operasyon.(EIM) (BANATNEWS)