Karambola sa sakyanan sa subway

CEBU, Philippines - Usa ang patay ug sobra sa lima ang naangol sa nahitabong karambola sa mga sakyanan kagahapon sa hapon diha sa subway habig sa barangay San Roque, dakbayan sa Sugbo.

Ang namatay mao si Florendo Peña, taga barangay San Roque, dakbayan sa Talisay ug naangol ang iyang truck boy nga si Justin Baculao, 15, taga barangay Duljo Fatima, dakbayan sa Sugbo.

Si Peña mao ang drayber sa Mitsubishi Canter nga trak nga nagtangag sa plakang JDG-526 kinsa napiit diha sa iyang trak ug nakuha lang human sa usa ka oras sa mga rescuer gikan sa pagkapiit.

Ang laing mga naangol mao sila si Rolando Brion, 36-anyos taga lungsod sa Borbon, nga drayber sa laing trak samtang angol usab iyang mga truck boy nga sila si Jesreal Goria, 22, ug Niño Palocano, 21.

Laing sakyanan nga nalambigit mao ang Sportage nga ang sakay mao ang nangaangol nga magtiayong sila si Erick Pesacador, 44, ug Juanita, 45, mga residente sa Talisay.

Naigo sad ang pick-up truck nga gimaneho ni Victor Tapia, 44, ug inahan niining si Aurelia, 80, nga naangol sad. Samtang kadaot lang sa iyang traysikol ang nasinati ni Renante Trazo, 33, ingon man ang awtong gidala ni Arnulfo Migallen, 52.

Sa imbestigasyon ni SPO1 Porferio Lim Jr., si Peña gikan sa Duljo- Fatima nga dunay kargang 400 ka mga kahon sa soft drinks paingon sa planta sa Compostela.

Giiingon nga kusog ang dagan ni Peña hinungdan nga miungad kini ngadto sa lubot sa trak nga gimaneho ni Brion kinsa miliwag sa wala ug nangadumbolan ang ubang sakyanan. (BANAT NEWS)