CEBU, Philippines - Ang kagamhanan sa lungsod sa Cordova nagpakitabang sa kagamhanan sa lalawigan sa Sugbo sa pagsuta sa mga utlanan niini sa yuta ug dagat tali sa mga dakbayan sa Lapulapu ug Talisay.
Si Mayor Adelino Sitoy sa Cordova nagkanayon nga iyang gihimo ang maong lakang human nila masayri nga ang sapa sa barangay Gabi ug Pilipog sa ilang lungsod mitadlas sa dakbayan sa Lapulapu kay didto man hikit-i sa habig na sa Lapulapu ang marker o mohon nga maoy silbing timaan sa utlahan sa lungsod sa Cordova ug Lapulapu.
Nasayran nga ang maong mohon gilubong sa mga Amerikano niadto pang tuig 1912.
Si Mayor Sitoy miingon nga dako kaayo ang ilang pagsalig sa buhatan ni Gobernador Gwendolyn Garcia nga maklaro ang utlanan sa ilang lungsod nga sa pagkakaron giangkon sa siyudad sa Lapulapu.
Hinuon wala pa makapadayag ang gobernador sa iyang reaksyon labot ning maong isyu.
Samtang gitataw ni mayor Sitoy nga gawas sa dakbayan sa Lapulapu, ila usab karong gisusi ang kinutoban sa ilang municipal water tali sa dakbayan sa Talisay sanglit ang gitumbok karon nga utlanan nila duol man kaayo sa ilang lungsod kay sa siyudad sa Talisay.
Si Sitoy nagtuo nga sa higayon nga maklaro na ang boundary sa municipal water sa Cordova hayan nga mas molapad pa unya ang kadagatan sa iyang lungsod. (BANAT NEWS)