Pagpa-review sa ordenansa wala tagda ni Rama

CEBU, Philippines - Wala hatagi og gibug-aton ni Mayor Michael Rama ang plano sa City Council nga ipa-review ang mga ordinansa nga nagtudlo sa mga tawong mahimong sakop sa nagkadaiyang komisyon ubos sa iyang buhatan.

Nakapangutana ang mayor kun nganong karon lang motumaw kining planoha.

Dili pa dugay gilahugay sa mayor ang mga komisyon nga ubos sa iyang buhatan sa mayor’s office nga matud pa ni Rama    iyang gisandig sa balaod bahin sa kwalipikasyon sa mahimong sakop niini.

Hinuon   matud pa ni Rama nga dili niya pugngan ang plano sa konseho ilabi na kun kini gitumong sa kaayohan sa katawhan.

Samtang si Bise Mayor Joy Augustus Young mitataw nga angayan nga aduna na gyu’y himoong kausaban sa ordinansa mahitungod sa mga komisyon sa City hall kay ang ubang sakop niini giingong napugos lang tungod sa gituman nilang   mandato sa ordinansa.

Nagkanayon si Young nga angayan nga ang molingkod nga sakop sa komisyon   mao lamang kadtong mga intresado ug   may panahon sa pagtambong sa nagkadaiyang tigom sa board. Giplanohan usab nga usbon ang pagpili og mahimong tsirman sa nagkadaiyang board gumikan kay busy na kaayo ang mayor sa ubang trabaho.

Apan gikatahong wala mahimuot si Young sa pagkatudlo   ni Renato Mercado nga maoy modumala sa Community Scouts Division and Mining Regulatory Board.

Apan si Rama midepensa niini ug miingon nga puro kwalipikado ang mga tawo nga iyang gipadumala sa nagkadaiyang komisyon busa iyang gipagamay ang mga pagsaway nga iyang nadawat bahin sa pagbutang og mga tawo sa nagkalainlaing komisyon ubos sa iyang buhatan.  - BANAT NEWS