CEBU, Philippines - Nagtingkagol sa karsel sa Talisay City Police Station ang usa ka 22-anyos nga lalaki nga suspetsado sa pagpamusil sa milabay’ng adlaw diha sa barangay Lawaan III, dakbayan sa Talisay.
Ang nasikop mao si Llyod Orsal Mangubat, taga sitio Pungsod sa nahisgutang barangay, gipangita pa ang kauban niining si Philip Cuizon Aro nga nakaikyas.
Si Chief Inspector Eddie Recamara, officer-in-charge sa Talisay City Police Station (TCPS) sa pakighinabi niini sa Banat News mibutyag nga ang duha sakop sa Crips gang.
Ang duha maoy suspetsado sa pagpusil patay niadtong Agosto 7, 2011 sa kaadlawon kang Jason Taberos Cuyoca, 28, diha sitio Riverside, Lawaan III.
Ang duha mao usab ang suspetsado sa pagpusil patay kang Isagani Vasquez Ravino, 25, nga mamaligyaay og haplas niadtong Mayo 25, 2011 sa kaadlawon diha sa barangay Lawaan III.
Matud sa OIC nga paregla ang usa sa motibo sa nahisgutang mga insidente. Si Mangubat ug Aro gipasakaan na og kasong pagpatay diha sa Talisay City Prosecutor’s Office. - BANAT NEWS