20 ka mga speaker moanhi sa Sugbo

CEBU, Philippines - Si Kalihim Alberto A. Lim sa Department of Tourism, (DOT) maoy manguna   sa 20 ka maayong laki nga mamumulong gikan sa nagkalainlaing bahin sa kalibotan   nga moabot dinhi sa Sugbo alang sa ipahigayong Philippine Meetings, Incentives, Coventions and Exibitions/Events Conference (MICECON) 2011, karong Agosto 10-13, 2011   sa Cebu International Convention Center (CICC) sumala ni DOT 7 Regional Director Rowena Montecillo.

Sumala kang Montecillo   nga pipila sa maong mga mamumulong maggikan sa Estados Unidos, Australia, Singapore, Thailand ug mga banggiitan ug ngilngig nga mga mamumulong gikan sa mga dagkong patigayon dinhi sa nasud.

Si Montecillo kinsa nakiglambigit sa mga     namatigayon ug mga butang nga may labot sa turismo mibutyag dinhi sa Sugbo nagkanayon nga pasaw-an sa maong mga batid sa   nagkalainlaing natad sa turismo ang ilang mga kahibawo ug naantigohan ngadto sa 350 ka mga gidapit nga motambong   sa maong kalihokan. Si Secretary Lim maoy pinasidunggang mamumulong   sa maong komperensya nga may tema “I Share, You Connect, We Change.”  

Matud pa ni Montecillo nga ang benepisyo nga idulot ug mahimong epekto sa maong komperensya dili lamang mabati sa lalawigan sa Sugbo apan maingon man sa ubang bahin sa Kabisay-an ug Mindanao tungod kay ang Sugbo maoy silbing bukana sa turismo   alang sa Visayas ug Mindanao .

Ang mga turista nga gikan sa gawas sa nasud kasagaran   anhi molandig sa Sugbo una sila mopadayon ngadto sa ilang destinasyon nga suroyan sa Kabisay-an ug Mindanao nga maglakip sa Boracay, Panglao sa Bohol, sa underground river sa Palawan o kaha Isla sa Samal sa Davao, matud pa ni Montecillo.

Gumikan niini daghan kaayong taga gawas ang madani sa pag-anhi dinhi   aron makasuroy sa nagkalain laing dapit dinhi sa nasud nga angayan kaayo nilang pahigayonan sa mga international meeting, incentive travel, convention ug uban pang kalihokan inig liwas niining MICE tour, matud pa ni Montecillo.  (BANATNEWS)