CEBU, Philippines - Samdan ang usa ka 38 anyos nga lalaki human kini pusila sa iyang gikabanging ig-agaw didto sa Sityo Tuhop, barangay Triumfo sa lungsod sa Carmen sa miaging hapon.
Ang biktima mao si Abraham Dayon Jr., 38 , minyo, nga nagpuyo sa nahisgutang lugar, samtang ang suspek mao ra usab ang iyang kaugalingong ig-agaw nga si Jovito Dayon, hingkod , nga iya ra usab nga silingan.
Si SPO2 Simplicio Gibo, desk officer sa Carmen Police Station mibutyag sa Banat News mga sumala sa asawa sa biktima nga si Florenda Dayon, hingkod , nga gisulong sa suspek ang iyang bana didto sa ilang balay ug gipusil kini sa way igong hinungdan.
Nagtuo si Florenda nga ang pagpamusil naggumikan sa panagdumot sa duha tungod kay dugay na silang nagkabangi sa butang nga wala ibutyag niini.
Samdan sa nagkalainlaing bahin sa lawas, daling gihatod ang biktima ngadto sa Danao City District Hospital . Samtang ang suspek padayon pang gipangita sa kapolisan human kini makasibat. - (BANAT NEWS)