Ramadan muslim community mikondenar sa ASG

CEBU, Philippines - Gikondenar sa mga Muslim nga nanimuyo dinhi sa Visayas ang brutal nga pagpatay sa pito ka mga sakop sa Philippine Marine Corps diin duha ka sundalo gipangpunggotan og ulo samtang ang uban gitagod-tagod og tigbas didto sa Patikul, Sulo niadtong milabay’ng semana.

Gipadayag sa director sa Commission on Muslim Filipinos (NCMF-7) nga si Malo Manonggiring nga ilang ipaneguro nga dili makalusot dinhi sa Sugbo ang grupo sa mga Abu Sayyaf nga gideklarar karon sa gobiyerno nga Public Enemy No.1.

Gisaway ni Manonggiring ang Abu Sayyaf nga matud pa niini dakong sala sa pagtulun-an sa Islam.

“Hindi natin matatawag na Muslim ang isang tao kung gumagawa sila ng maling bagay sa kanilang kapwa,” matud pa ni Manonggiring.

Tungod sa gibuhat sa mga teroristang Abu Sayyaf gimando ni Presidente Benigno Aquino III ang walay puas nga operasyon batok kanila bisan sa pagsugod na sa Ramadan kagahapon (Agosto 1).

Samtang si Manonggiring mipasalig nga motabang sila sa mga awtoridad sa Kabisay-an sa pagsigurong walay mga teroristang pundok nga makasulod ug manghasi dinhi sa Kabisay-an.

Ang Muslim community inabagan sa law enforcement agencies adunay gitahasang mga volunteers nga maoy maniid sa mga bag-ong abot dinhi nga gikan sa Mindanao aron masiguro ang kahusay ug kalinaw sa Sugbo.

Base sa talaan moabot na ngadto sa 90,000 ang populasyon sa Muslim community sa Sugbo. Sagad kanila dinhi na namuyo ug nanginabuhi ug dinhi na nagpaeskuyla sa ilang mga anak.

Nanawagan karon si Manonggiring sa ikaduhang adlaw sa Ramadan sa pagsunod sa pag-puasa subay sa gitudlo sa Koran.

“Mayaman man o mahirap, pareho tayong nagugutom. Ang importante ngayon, ay sumusunod ang mga Muslim sa mga alituntunin ng Ramadan at tayo ay nagkakaisa,” sumala pa ni Manonggiring.

Samtang usa ka muslim ang nahinabi sa Banat News kagahapon nga ginganlan og Murina Aril Asolite nagkanayon nga lakip sa ilang pagsunod sa pagbukas sa Ramadan mao ang paghatag og panahon niini sama sa temporaryong pagpanirado sa ilang mga tindahan aron ikauban ang ilang pamilya sa pag-ampo sa mosque.

Si Asolite mikondenar usab sa gihimo sa mga Abu Sayyaf ngadto sa mga sundalo ug miisip kanila (ASG) nga maoy nagdala og gubot sa nasud.

“Malipay gyud mi og maayo kung mabungkag na ang Abu Sayyaf. Nakahatag man gud na sila og kasamok,” matud pa ni Asolite.   (EIM)   - (BANAT NEWS)