MCPO magkonsiyerto sa kabarangayan

CEBU, Philippines - Gipakita sa kapolisan sa Mandaue City Police Office (MCPO) nga wala lamang sila mabansay isip polis kun dili hanas usab sila sa natad sa arte pinaagi sa pagtukar sa mga tulunggon sa musika ug pagkanta sa gikatakdang mga konsiyerto nga ilang pagahimuon sa kabarangayan.

Gipakita sa kapolisan sa dakbayan sa Mandaue ang mao nilang talento sa ilang pagpasundayag niadtong miaging adlaw atol usab sa gipasiugdahang programa sa kapolisan nga “Pasiklab ni Tsip” nga gipahigayon sa Elizabeth Mall sa dakbayan sa Sugbo niadtong miaging adlaw.

Si Sr. Supt. Noel Gillamac nga maoy direktor sa MCPO miingon nga ang mao nilang talento gikatakdang mopahigayon og mga konsiyerto sa kabarangayan sa dakbayan.

Matud pa ni Gillamac nga ang pagpabati sa maanindot ug mananoy nga mga huni sa musika maoy laing pamaagi nga pagpaduol sa kapolisan ngadto sa kasingkasing sa katawhan nga ilang gialagaran.

Si Gillamac miingon nga mitumaw sa iyang hunahuna nga matukod ang MCPO band dihang iyang namatikdan nga daghan sa iyang mga sakop nga adunay tinagoang talento sa pagkanta ug sa pagpatugtog ginamit ang nagkadaiyang instrumento sa musika. (BANAT NEWS)