CEBU, Philippines - Usa ka lalaki kinsa giingong naghupot og ginadiling drugas ang mikaratil og dagan dihang paingon unta kining sitahon sa mga polis tungod sa kalapasan niini sa trapiko niadtong Huwebes sa gabii diha sa barangay Cansojong, dakbayan sa Talisay.
Ang suspetsado mao si Marley Badajos, taga sitio Tunga, barangay Tanke dakbayan sa Talisay kinsa naabtan ug nakuhaan og ginadiling drugas nga giingong iyahang gilabay.
Si PO1 Euwen Pitogo sa pakighinabi niini sa Banat News kagahapon mibutyag nga sila si Inspector Hugo Rio Ipong ug PO2 Roy Lonfranco nagpahigayon og follow-up kabahin sa nahitabong tulis sa usa ka lending firm nga gitulis dihang nasundan nila ang gisakyang motorsiklo sa suspetsado kinsa dunay duha ka mga angkas.
Matud ni Pitogo nga overloading si Badajos tungod kay usa lang ang pweding makaangkas sa motorsiklo hinungdan nga ilaha kining gipahunong.
Dihang mihunong si Badajos ug mipaduol ang mga polis kalit nga duna kini gilabay diha sa daplin sa karsada dayon mikaratil og dagan gibiyaan ang iyang motor ug iyang duha ka angkas nga iyang mga igsuong lalaki nga si Raffy Badajos ug babaye nga wala makuha ang pangalan sa kapolisan.
Daling gipunit sa mga polis ang gilabay’ng butang ni Badajos diin nasuta nga 23 diay ka paketeng shabu hinungdan nga ilaha kining gigukod apan wala na maapsi.
Matud ni Pitogo nga kaniadto nasikop usab nila si Badajos sa kalapasan sa Akta Republika 9165 kon “comprehensive dangerous drugs act law” apan nakapiyansa kini alang sa iyang temporaryong kagawasan.
Gidala sa mga polis ang nahisgutang ginadiling drugas ug ang Suzuki nga motorsiklo niini nga nagtangag sa plakang 5447-LO diha sa police station ug ang duha ka igsuon niini giimbitar usab sa mga polis apan human gipangsukit-sukit gipapauli usab dayon. (BANAT NEWS)