CEBU, Philippines - Gihugopan sa mga lokal ug langyaw’ng turista ang tinuig nga pagsaulog sa ika-upat nga Kaumahan Festival didto sa lungsod sa Barili sa miaging adlaw nga wa maapektohi sa kusog nga uwan.
Ang migawas nga kampiyon sa bangga sa street dancing mao ang barangay Mantalongon, ika-duha ang Malolos ug ang ika-tulo mao ang Guiwanon kinsa nakadawat og P30 mil, P20 mil, ug P10 mil mata’g usa.
Ang barangay Guiwanon maoy napili nga Festival Queen. Gisugdan ang maong festival sa ala 1:00 sa hapon ug natapos sa alas 5:00 sa hapon diin may lima ka mga contingent ang misalmot gikan sa nagkalain-laing barangay sa Barili.
Si Mayor Teresito Marinas maoy personal nga mitunol sa premyo sa mga mananaug nga contingent nga gisaksihan usab ni Gobernador Gwendolyn Garcia ug ubang opisyal sa probinsiya nga mitambong sa maong kalihokan.
Ang Kapitolyo mihatag og P300 mil nga gahin alang sa Kaumahan Festival sa maong lungsod.
Sumala ni PO1 Glenn Buena sa Barili Police Station nga malinawon kaayo ang kalihokan ug bisan nag-uwan wala mamiya ang katawhan ug nagpabilin hangtod nga nahuman ang pasundayag sa street dancing.
Ang Kaumahan festival maoy napilian ni Mayor Marinas nga himoong ngalan sa ilang tinuig nga kalingawan aron pagdasig sa mga mag-uuma sa ilang lungsod ug pag-promote sa nagkalain -laing produkto sama sa utanon, ug mga prutas nga mangga, lubi ug uban pa nga maoy panginabuhian sa mga molupyo sa ilang lungsod. (BANAT NEWS)