CEBU, Philippines - Patay nang nadangat sa tambalanan ang usa ka 3- anyos nga batang lalaki human aksidenteng mibuto ang armas nga giduwaan niini sulod sa ilang pinuy-anan samtang nag-inusarang nahabilin.
Ang aksidente nahitabo sa sitio Laray sa barangay Canamokan lungsod sa Compostela niadtong Lunes sa alas 9:00 sa gabii nga miresulta sa kamatayon ni Vincent Tirado,3.
Ang amahan sa bata nga si Teodoro Tirado giimbestigar karon sa kapolisan kabahin sa maong hitabo.
Matod ni PO2 Richeliue Ayuda sa Compostela Police Station dihang nahinabi sa Banat News nga ang bata mao ray nabilin sa ilang balay gumikan kay dunay gilakaw ang mga ginikanan niini.
Samtang ang iyang maguwang nga 10-anyos nga lalaki didto kini sa gawas nga bahin nakigduwa sa laing mga bata.
Gidudahang nadumduman sa biktima ang kalibre .38 nga armas sa iyang amahan nga gibutang ilawom sa unlan sa gibuklad nga higdaanan ug giduwaan kini apan aksidenteng mibuto.
Ang bata naigo sa dughan nga nakaingon sa iyang kamatayon. Ang mga silingan ug paryente nga nakadungog sa buto daling misusi sa balay ug didto nakit-an ang biktima nga nagbuy-od na ug nagkadugo tupad ang armas ug dali nilang gihatud sa Danao City District Hospital apan gideklarar nga Dead on Arrival (DOA).
“Akong pagtuo ani giduhaan ka kamot pagkablit sa bata maong nibuto, naanad siguro ni sige kakita og pusil-pusil maong gaduwaduwa sa armas,”dugang pamahayag ni Ayuda.
Hinuon gisumiter na alang sa ballistic examination ang armas ug gipaubos pa sa dugang imbestigasiyon ang mga ginikanan sa biktima tungod sa pagpabaya niini sa armas nga nakaingon sa hitabo.
Sa paghimo ning balita wala pay napresentar nga dokumento ang mga ginikanan sa bata pagmatuod nga lisensyado ang maong armas. (BANAT NEWS)