CEBU, Philippines - Dili na mahinayon karong adlawa ang pagpadayon sa husay sa Department of Interior and Local Government sa kasong gipasaka ni anhing Bise-Gob. Gregorio Sanchez, Jr. batok kang Gob. Gwendolyn Garcia.
Wala hinuon nakadawat og telegrama ang duha ka habig gikan sa DILG hangtud niadtong Biyernes. Apan ang anak ni Sanchez, Engr. Grecilda Sanchez-Zaballero, mitug-an nga may nagpahibalo kaniya nga ang husay gisibog sa Agosto 1.
Usa sa mga abogado ni Garcia, Atty. Rory Jon Sepulveda, miingon nga wala usab silay nadawat nga telegrama.
Ang DILG mitakda sa laing husay karon untang adlawa hangtud sa petsa 28. Apan si Atty. Christina Codilla-Frasco, anak ni Garcia, nihangyo sa DILG nga i-uswag ang husay sa kaso sanglit wala siya sa nasud gikan sa petsa 20 hangtud 29 sa buwan sa Hulyo.
Mihangyo usab si Frasco sa DILG nga sulbaron una ang ilang manifestation sa niaging husay labot sa pagkwestiyon sa legalidad ni Zaballero sa pagbarug sa iyang amahan.
Laing manifestation mao nga angayan na nga ibasura ang kaso sanglit ang tanan gipasangil nahitabo man sa wala pa napili pag-usab si Garcia sa katungdanan.
Si Sanchez mireklamo sa giingong pag-ilog ni Garcia sa iyang gahom sama sa pagtudlo og mga kawani sa Sangguniang Panlalawigan. - BANAT NEWS