Ginikanang mopa-cybersex sa anak di pasayloon

CEBU, Philippines - Mibahad si Gobernador Gwendolyn Garcia nga dili siya makapasaylo sa mga ginikanan nga motugyan sa ilang mga menor de edad nga mga anak sa cybersex o kaha ngadto sa mga human trafficker ilabina sa mga langyaw.

Matud pa sa gobernador nga ang kagamhanan sa lalawigan sa Sugbo dili mohunong sa subsub nga kampanya niini batok sa cybersex ug sa mga tawong nagpaluyo niini.

Matud pa ni Gobernador Garcia nga wala siya’y undang sa paghatag og pahimangno sa mga ginikanan nga undangon na ang ilang kabuang sa pagpangwarta sa ilang kaugalingong mga anak pinaagi sa paggusbat sa moral niini sa cybersex .

Kini luyo sa kamatuoran nga sila mismo nasayod sa kangil-ad niining buhata ug ang dautang epekto niini sa pagkatawo sa ilang mga anak.

Ang gobernadora miingon nga paningkamutan niya nga ang mga ginikanan manubag sa dangatan sa ilang mga anak ug ang bug-at nga silot angay ipahamtang kanila.

Gusto sa gobernadora nga ang walay puangod nga mga ginikanan mabilanggo sa Cebu Provincial Detention and Rehabilitation Center (CPDRC) aron matudloan sila sa tukmang disiplina. (BANAT NEWS)