CEBU, Philippines - Usa patay ug duha ang angol dihang usa ka 10-wheeler truck nga naputlan sa preno ang midaro ngadto sa laing mga sakyanan kagahapon sa alas 9:20 sa buntag diha sa barangay Bunga, dakbayan sa Toledo. Ang namatay giila sa kapolisan nga si John Sabinay, 57, residente sa maong dapit ug magtutudlo sa Bunga National High School nga nagmaneho sa iyang motorsiklo.
Si Sabinay giingong nakaangkon og grabeng kadaot sa iyang ulo ug lawas tungod sa pagkabunal niini diha sa karsada.
Samtang ang mga naangol mao sila si Murillo Sabanal, 30, drayber sa pick-up truck nga gipanag-iya sa Carmen Copper Corporation (CCC) diha sa Toledo ug ang truck boy niini nga si Jovanni Enriquez kinsa nabalian sa bukton.
Ang tulo ka mga biktima daling gidala ngadto sa tambalanan sa sulod sa CCC apan mga alas 11:30 sa buntag kagahapon si Sabinay nakabsan sa kinabuhi samtang sila si Sabanal ug Enriquez gibalhin sa mga tambalanan sa dakbayan sa Sugbo.
Si Navaro Hermojenes, 57, taga Minulos, lungsod sa Barili, drayber sa 10-wheeler truck nga nakadasmag nadetiner na sa Toledo City detention cell.
Si PO3 Cris Gako sa Toledo City Police Traffic Division mibutyag nga si Hermojenes dunay kargang 600 ka bag nga mga semento gikan sa dakbayan sa Sugbo paingon sa Toledo.
Apan pag-abot diha sa nahitaboan kalit lang nga wala na mokupot ang preno sa trak ug nalahos ngadto sa nahisgutang mga sakyanan. Laing motorsiklo nga nagparada diha daplin sa karsada nga gipanag-iya ni Morena Pacaña, naigo usab sa maong trak dayon napunggit ang gikasugat nga pickup nga gisakyan ni Sabanal ug Enriquez.
Laing truck nga nagtangag sa plakang MDT-949 nga gimaneho ni Arbenson Gabison, gikan sa Lutopan ang nabag-iran sad una pa kini mihunong dihang nahagbong sa kanal.
Si Hermojenes gikatakdang pasakaan og kasong reckless imprudence resulting to homicide, physical injury ug damage to properties karong Lunes. (BANAT NEWS)