Pagpanindot sa sidewalks gisangon kang Faelnar

CEBU, Philippines - Gitahasan ni Mayor Michael Rama si kanhi kapitan sa Barangay Guadalupe nga si Eugenio “Jingjing Faelnar” nga mangulo alang sa plano niya nga sidewalk restoration sa maong barangay ug kini ubos sa Public Private Partnership (PPP).

Nagkanayon ang mayor nga panahon nang mahatagan og maayong sidewalk ang nagkadaiyang kadalanan sa maong dapit ilabi na nga mao kini ang labing dako nga barangay sa siyudad.

Nasayran nga dunay pipila ka dalan sa Guadalupe ang wala na maklaro ang sidewalk sama sa M. Velez, V. Rama ug uban pa.

Matud pa niya nga dako og matabang ang pribadong sector sanglit duna sila’y mga maayong resources alang sa maong katuyoan.

Nagkanayon si Rama nga pipila ka mga programa sa siyudad ang gisuportahan sa pribadong sector diin pipila niini naglangkob sa pagpalambo sa mga police station, beautification project alang sa uptown area, ug mga kahimanan sa Cebu City Medical Center.

Sumala pa sa mayor nga tulin ang pagkab-ot sa mga maayong programa alang sa katawhan kung magtinabangay ang gobiyerno ug ang pribadong sector. - BANAT NEWS