Mag-cybersex mag-sex bisa'g way camera

CEBU, Philippines - Ang mga batang nalambigit na sa cybersex posibleng makighilawas sa sama kanilang menor de edad bisan sa mga lugar ug higayon nga walay camera tungod kay naanad na sila niini, matud pa ni manlalaban Joan Saniel, executive director sa Children’s Legal Bureau (CLB). Si Saniel nga gihinabi sa Banat News kagahapon nagkanayon nga sa kalinghod sa pangidaron sa mga bata nga makatilaw na og sex daku ang posibilidad nga aduna kini psychological effect bahin sa kahinam sa pakighilawas.

Gipasabot ni Saniel nga ang pagpakighilawas maoy naandan na nga buhat sa mga bata nga nalambigit na sa cybersex ug pangitaon na nila kini matag karon ug unya. Kasagaran sa mga makasinati og psychological effect mao kadtong mga menor de edad nga dugay nang misulod sa prostitusyon.

Hinuon iyang giklaro nga ang mga batang naluwas gikan sa cybersex niining bag-o lang sa lungsod sa Cordova, wala pa mamatikdi nga nakasinati og psychological effect bahin sa pakighilawas.

Gibutyag usab ni Saniel nga sa ilang imbestigasyon ang mga batang nabiktima sa cybersex dili lang pahuboon atubangan sa camera kundili pahimoon gayud og linawas nga pakighilawas ang babaye ug lalaki o kaha pagamiton og sex toy atubangan sa camera. Ang mga batang naabusohan adto itugyan sa ahensiyang hingtungdan sama sa City Social Welfare diin ipaubos sila sa mga therapy aron maka-recover gikan sa ilang dili maayong kasinatian.

Si Saniel mibutyag usab nga aduna pa silay gipanid-an nga mga cybersex den dinhi sa Sugbo ug mibahad nga kutob sa ilang madakpan pahamtangan og labing bug-at nga silot nga pagkabilanggo sa tibuok kinabuhi.  - BANAT NEWS