Nagsuyop og shabu sa akto tiklo

CEBU, Philippines - Usa ka ulitawong taga dakbayan sa Talisay nasakpan sa akto sa kapolisan sa lungsod sa Cordova   nga nagsuyop og shabu didto sa barangay Poblacion sa maong lungsod sa miaging kaadlawon.

Ang nagtingkagol karon sa prisohan sa Cordova mao si Mario Palao Español, 30, ulitawo, nga taga barangay Cansojong, dakbayan sa Talisay kinsa tua magtrabaho sa Cordova.

Si PO3 Rolando Tagsip sa kapolisan sa maong lungsod nga nahinabi sa Banat News miingon nga nakadawat sila og taho gikan sa usa  ka molupyo sa maong dapit kalabot sa bisyo   sa suspetsado sulod sa tindahan sa sapatos nga iyang gitrabahoan.

Matud pa ni PO3 Tagsip nga si SPO1 Laurencio Wagwag ug mga kaubang sakop sa Alert team sa kapolisan sa maong lungsod maoy mironda sa nahimutangan sa suspetsado.

Miingon si PO3 Tagsip nga naabtan sa kapolisan ang suspetsado nga nagpiyongpiyong sa pagsuyop sa aso sa shabu hinungdan nga wala na kini makamatikod sa pag-abot sa mga otoridad.

Nasakmit sa kapolisan gikan kaniya ang usa ka pakete sa gituohang shabu, lighter, mga tinfoil ug uban pa nga mga kahimanan alang sa paggamit niini. Dugang pa ni PO3 Tagsip nga si Español may mga kaubang manuyopay   usab og shabu niadtong higayona apan una kining nakamatikod sa kapolisan hinungdan nga mikaratel og panagan busa wala hidakpi.

Pagmata ni Español posas sa polis maoy misugat sa iyang panan-aw ug igo nalang siya sa pagtunol sa iyang mga kamot ug nagpa-posas.

Hayahay kaayo siya karon sa prisohan sa Cordova. (BANAT NEWS)