CEBU, Philippines - Usa ka trak de karga nga kargado og bas sa dagat nga gimaneho sa anak sa kapitan sa barangay Maghaway, dakbayan sa Talisay wala makadagan human ma-flat ang ligid kay gipusil didto sa Cansojong sa maong siyudad niadtong Lunes sa gabii.
Ang drayber sa maong sakyanan nga si Daniel Cabatas, 21, anak ni Kapitan Victor Cabatas sa barangay Maghaway, Talisay gibalhug dayon sa prisohan.
Kini human siya masikop ni Danilo Canton Salceda, 44, nga taga Cansojong kinsa maoy mipusil sa ligid sa iyang de karga gumikan sa giingong kalapasan sa balaod batok sa pagpangubkob og bas sa dagat.
Si Salceda miangkon nga iyang giluthang ang ligid sa sakyanan ni Cabatas kay wala kini muhonong ug naluya siya og gukod ug mihunong lamang kini dihang nasabak na sa bala ang ligid.
Ang de karga puno sa 2.5 cbu nga bas nga giingong gikubkob gikan sa baybayon sa Canton Beach, sa Cansojong.
Si Cabatas gitugyan ni Salceda ngadto kanila ni SPO1 Oliver Dacua, PO3 Eric Enad ug PO2 Aquilles Cabando kinsa miresponde sa insidente.
Base sa blotter sa kapolisan sa Talisay nga human pusila ni Salceda ang ligid sa trak, si Cabatas mao na usay gitionan sa sumbohan sa iyang armas, dayon mipasalba niini ug miingong” pamatyon ta mong tanan” sumala sa asoy sa magtiayong Glenda Bacaltos ug Elesio Canton, uyoan ni Salceda.
Hinuon gipanghimakak ni Salceda ang maong pasangil kinsa miingon nga dugay na niyang gidid-an ang iyang uyoan sa pagbaligya sa bas sa baybayon sa maong lugar aron kalikayan ang kapeligro sa lunop.
Si Kapitan Cabatas sa iyang bahin nga nahinabi sa mga tigbalita nagkanayon nga ang bas nga ilang gihakot gipalit nila gikan ni Canton og tag P1,000 matag trak.
Midugang siya nga linabay na ang maong bas gikan sa rip-rap ni Canton busa gipamaligya nalang kini kanila, nga ila usab nga ibaligya ngadto sa ilang mga suki sa bas, matud pa ni Cabatas.(WC) (BANAT NEWS)