CEBU, Philippines - Sobra sa 10 ka mga tawo ang naangol usa kanila ang talandugon human ang multicab nga midaro sa usa ka traysikol milahos sa pundok sa mga tawo sa daplin sa karsada sa sitio Kwadro, barangay Lagtang, dakbayan sa Talisay niadtong milabay’ng adlaw.
Ang drayber sa multicab nga si Archie Lañojan, 29, taga sitio Tiguib, sa nahisgutang barangay giingong hubog nianang hitaboa ug mitahan sa kapolisan human sa hitabo.
Giila ang mga naangol mao sila si Rogen Baisac, drayber sa traysikol, Xyra Mae Prajes, 9, Jenelyn Lamo, 12, Caroline Sevilla, 35, kinsa maoy giingong kritikal ug naa karon sa Vicente Sotto Memorial Medical Center, Arlene Prajes, 30, Arvie Rose Calderon, 10, Rachel Taburada, 12, magsuong Shadley ug Janice Rabago nga nagpanuigon og 8-anyos ug 17-anyos ug ang ilang ginikanan nga sila si Connie, 38 ug Delfin Rabago, 41 ug Jerica Yvalle, 10.
Si SPO3 Frederick Larrobis sa Talisay City Traffic Division nga nahinabi sa Banat News nagkanayon nga gikan sa Tabunok ang multicab paingon sa sitio Tiguib dihang kalit lang kining misimang sa wala ug midaro ngadto sa traysikol nga nagpundo diha daplin sa karsada nga gisakyan ni Baisac ug nalahos sa mga tawo.
Si Archie nga nahinabi sa Banat News mihimakak nga hubog siya atol sa aksidente, sumala pa niini nga nawagtang siya sa iyang huna-huna tungod kay nag-away siya ug ang iyang asawa ug nakurat siya sa kalit nga paglabang sa usa ka bisekleta maong milikay siya apan napunta sa maong traysikol ug sa mga tawo. (BANAT NEWS)