Alarm system nakabulabog, acetylene gang nakasibat

CEBU, Philippines - Napakyas ang mga gidudahang sakop sa acetylene gang sa ilang pagsulay unta og lungkab sa usa ka pawnshop sa dakbayan sa Danao human motingog ang alarm system sa maong establisamento nga nakapapukaw sa mga residente sa dalan Pio del Pilar sa barangay Poblacion.

Si SPO2 Marias Galo sa kapolisan sa maong dakbayan nga nahinabi sa Banat News miingon nga sa sayo pa sa miaging Domingo sa kaadlawon iyang nadawat ang tawag sa telepono nga adunay nagpahibalo kalabot sa kalit nga pagtingog sa alarm system sa Oro China Pawnshop.

Dihang giadto sa kapolisan wala diay kini nagbantay nga gwardiya ug sirado man kini ug mihunong na usab sa pagtingog sa alarm system niini hinungdan nga mibalik sila sa ilang buhatan.

Apan nianang pagkahayag na, si Galo mibutyag nga nadiskubrehan sa mga kawani sa maong prendahanan nga gisuwayan diay og lungkab ang ilang tindahan tungod sa dakong lungag gikan sa sawog.

Nasuta nga adunay gihimong tunnel sa ilawom nga dihang gisubay miabot kini sa kasikbit nga balay nga diin adunay nag-abang nga usa ka babayeng nagpailang Donna Laode Gonzales nga taga Yati, lungsod sa Liloan uban sa laing tulo ka wala mailhing mga lalaki.

Ang tunnel gikan sa sikbit nga balay nga gipanag-iya ni Fernando Cal Jr.

Nasuta sa kapolisan nga si Gonzales nagpakaaron-ingnong magtukod og parlor sa maong giabangang pwesto ug mihangyong magkawot aron kabutangan og septic tank.

Si Galo miingon nga panahon sa gabii nga milungtad kapin sa usa ka semana hangtod nga naabot na gyud ang vault sa maong pawnshop.

Sumala pang Galo dihang gisuwayan na og lungkab ang vault mitingog ang alarm system niini ug sa kahadlok sa mga kawatan nga masakpan sa akto gibiyaan ang maong prendahanan nga walay nadala.  (BANAT NEWS)