CEBU, Philippines - Dili ipabaligya sa korte ang 1.3 ektaryang luna nga kanhi relis nga karon giangkon sa usa ka Intsik sa sitio San Vicente, Tabok, dakbayan sa Mandaue.
Sa kamanduan nga giluwatan ni Regional Trial Court (RTC) Branch 8 Presiding Judge Macaundas Hadjirasul niadtong Marso 11, 2010, wala tugoti si Lim Teck Chuan nga mobaligya sa Lot. No. 27 nga dunay Transfer Certificate of Title No. (T-17361)-5423.
Si Chuan kinsa gihimong administrador sa tag-iya nga si Antonio Lim Tanhu nisang-at og Motion for Authority to Negotiate and Sell ug Motion for Annotation niadtong Pebrero 4, 2010 ug Pebrero 12, 2010.
Ang korte nimando hinoon kang Chuan sa pagpakigsabot-sabot sa kagamhanan sa dakbayan sa Mandaue alang sa posibleng pagbaligya sa luna.
“However, this does not constitute an authority to sell said lot,” nagkanayon ang kamanduan sa korte.
Dul-an sa 200 ka panimalay ang nahulgang ibton gikan sa nahimutangan niini human usa ka Paz Lim ang nagpailang sumusunod sa kabtangan ni Lim isip umagad ug bana sa bugtong anak nga si Henry Ngo Lim.
Gitagalan ni Paz ang mga molupyo hangtud sa Disyembre ning tuiga sa pagbayad sa luna apan kadaghanan nagdumili nunot sa kalibog kung kinsa ang tinuod nga tag-iya nga maoy ilang bayran.
Nidangop na ang mga molupyo sa ilang barangay kapitan nga si Felix Suico aron mapaabot ngadto kang Mayor Jonas Cortes ang maong problema ug masubay kung kinsa ang tag-iya sa luna.
Desidido nga maangkon sa mga molupyo ang luna apan gusto nilang masiguro nga wala na’y laing tawo nga moangkon niini sa umaabot nga mga adlaw. - BANAT NEWS