Sakyanan alang sa delegado sa EATOF andam na

CEBU, Philippines - Naandam na sa lalawigan sa Sugbo ang mga sakyanan nga pasakyan sa mga head of states sa Asia nga motambong sa ika-11 nga East Asian Inter-regional Tourism Forum (EATOF) nga pasiugdahan sa kagamhanan sa lalawigan Sugbo.

Ang maong mga sakyanan iya sa Hyundai-Cebu Inc. kinsa mitanyag kang Gobernador Gwendolyn Garcia sa ilang 12 ka mga luhong sakyanan ug labing bag-ong modelo alang sa malampusong pag-alagad sa probinsiya sa Sugbo sa umaabot nga 11th EATOF meeting nga ipahigayon sa Cebu International Convention Center (CICC) sa siyudad sa Mandaue karong September 14 -17 ning tuiga.

Si Lowell Belarmino, ang General Sales Manager sa Hyundai Cebu Incorporated, miingon nga ang ilang pagtanyag sa 12 ka mga nindot nga sakyanan ngadto sa probinsiya maoy pagpaila nila sa ilang tinuoray nga suporta kang Gobernador Garcia.

Gawas sa 12 ka mga luhong sakyanan nga alang sa mga delegado, ipagamit pa sa maong kompaniya ang laing duha ka van alang sa mga sakop sa secretariat sa maong kalihokan

Si Grace Paulino nga maoy Provincial Tourism Officer mapasalamaton usab kaayo sa tabang sa Hyundai Cebu Incorporated sa ilang boluntaryong pagpagamit sa ilang mga sakyanan   sa katibuk-ang mga higayon sa nahisgotang kalihokan.