CEBU, Philippines - Usa ka babayeng ‘dalaw’ sa usa ka bilanggo sa Mandaue City Jail (MCJ) ang nasakpang buot untang mopalusot og ginadiling drugas atol sa pagbisita niini sa kapuyo nga piniriso sa milabay'ng hapon.
Ang nasikop mao si Mary Jane Sayson, 32, residente sa Mantuyong dakbayan sa Mandaue kinsa giingong mobisita unta sa kapuyo niining si Nelson Basubas kinsa napriso tungod gihapon sa illegal drugs.
Matod pa ni JO2 Annie Rose Berdin ang in-charge sa female inspection nga kadudahan kaayo ang mga lihok ni Sayson atol sa paghiling niya sa lawas niini.
Sa pagkuot ni JO2 Berdin sa bulsa ni Sayson ug sa pagsusi sa nilikit nga kwarta didto iyang nakita ang duha ka gagmay’ng pakete sa gituhoang shabu ug tin foil sulod sa 20 pesos.
Nasuta nga si Sayson nanginabuhi pinaagi sa pagpamasura alang sa iyang tulo ka mga anak apan karon siya na usab ang posibleng matanggong tungod sa nakuhang shabu ug naproblema kining wala nay moalima sa iyang mga anak.
Si Sayson kagahapon pormal nang gipasakaan og kasong kalapasan sa RA 9165 ubos sa Section 11 kun paghupot og illegal nga drugas ug kasamtangang gibalhog sa Mandaue City Jail Women’s Correctional. (BANAT NEWS)