CEBU, Philippines - Sa labing unang higayon mibisita sa buhatan ni Gobernador Gwendolyn Garcia si Ambassador Jorge Domeq , ang embahador sa Espanya nganhi sa Pilipinas sa miaging Biyernes.
Usa sa tuyo ni Domeq mao ang pagsuta sa kahimtang sa ekonomiya dinhi sa lalawigan ilabi na sa natad sa turismo.
Kini tungod kay dako ang posibilidad nga makadala siya og mga investor gikan sa nasud sa Espanya ug mobubo og puhonan ilabi na sa natad sa turismo; inprastraktura; patubig; waste management ug renewable energy nganhi sa Sugbo.
Nahisgutan usab nila ni Gobernador Garcia ug embahador Domeq ang bahin sa pagpalambo sa pinulongang Espanyol isip ikaduhang lingwahe dinhi sa nasud nga mahimong masulti sa mga kabataan nga nagtungha sa high school sa tibook Pilipinas ilabi na dinhi sa Sugbo, ang lugar nga unang midawat sa mga Espanyol uban ang pagsagop sa pinulongan niini.
Atol sa pagbisita sa ambassador sa Espanya gipahalipayan usab niini si Gobernador Garcia og usa ka libro nga makita ang replica ug estorya sa Espanya.
Samtang ang gobernador mitunol usab og mga souvenir nga nagpakita sa kaanindot sa Sugbo. (BANATNEWS)