Mga kahoy gisakmit

CEBU, Philippines - Mokabat sa P267,000 nga kantidad sa mga coco lumber ang naembargo sa Philippine Coast Guard-Cebu niadtong Sabado sa buntag diha sa Plaza Independencia, dakbayan sa Sugbo.

Ang maong mga kahoy nga gikarga sa duha ka 10-wheeler trucks giingong expired na ang mga dokumento niini sa pagbiyahe dihang gisusi sa mga sakop sa PCG sa alas 8:30 sa buntag dihang migawas na kini diha sa gate sa Pier 1.

Ang maong mga kahoy gilangkuban sa unom ka crates sa 12-feet ang gitas-on nga 9,000 board feet; lima ka crates sa 8-feet nga gitas-on nga 6,500 board feet; usa ka crate sa 10-feet ang gitas-on nga1,200 board feet nga misuma-total og 16,700 board feet.

Ang hepe sa PCG nga si Rolando Punzalan mibutyag nga duha ka mga trak nga gikargahan sa mga lumber sakay sa MV Lite Ferry 15 ug naabot diha sa pantalan mga alas 6:45 sa buntag.

Si Ali Sitoy, shipping agent sa maong mga karga mipakita og “permit to transport” ug “permit to cut coconut trees” nga mga dokumento nga giisyu sa Dipolog City.

Apan sa pagsusi niini sa mga awtoridad nahibaw-an nga ang mga dokumento expired na ug ubos kini sa pangalan ni Michael Gutierrez sa dakbayan sa Lapu-Lapu. Ang maong mga kahoy giingong i-deliver unta diha sa Central Lumber Hardware sa barangay Mambaling, dakbayan sa Sugbo.

Si Ruben Miraña, Aurito Orozco ug Valeriano Mayormita Jr. sa Philippine Coconut Authority (PCA)-7 mikompirmar nga expired na ang dokumento sa nahisgutang mga kahoy.

Ang Akta Republika 8048 kon “Coconut Preservation Act of 1995” nagkanayon nga “considering the importance of the coconut industry in nation building being one of the principal industries and one of the largest income earners of the country, it becomes mandatory for the Government to step-in and regulate the unabated and indiscriminate cutting of the coconut trees”.

Si Emiliano Balios, provincial coconut development manager nagkanayon nga ang nahisgutang mga lumber dalhon ngadto sa PCA-Cebu. - Ug Ria Mae Y. Booc sa The Freeman/EIM (BANAT NEWS)