Kaumahan festival karong hulyo 26 andam na

CEBU, Philippines - Nagkadaiyang mga produktong utanon ug ubang klase sa pananom ang iparada sa kagamhanan sa lungsod sa Barili atol sa ilusad nila nga 4th Kaumahan Festival karung petsa 26 niining bulana nga tambungan mismo ni Gobernador Gwen Garcia ug ubang opisyal sa Kapitolyo.

Sa pagkakarun andam na ang lima ka mga contingents nga maoy magtigi alang sa street dancing sa Kaumahan festival nga gilangkoban sa Malolos National High School, Luhod National high School, Bulok bulok National high School, Mantalongon National High school ug ang barangay Guiwanon Sinapay Festival.

Gibutyag ni Barili mayor Teresito Marinyas dihang nahinabi sa Banat News sugdan ang maong kalihukan pinaagi sa Santos nga Misa pagka alas 10:00 sa buntag sa petsa 26 ug pagka 1:00 sa hapon sugdan dayun ang parada ug mosunod na ang street dancing.

Ang probinsiya sa Sugbo mihatag og P300 mil alang sa premyo ug ubang gastuhan sa tinuig nga pagpahigayun sa Kaumahan Festival.

Gibutyag ni Marinyas kini maoy ika-upat ka tuig na sukad gilusad nila ang Kaumahan Festival nga gitumong aron pag-promote sa lain laing mga produkto sa umahan nga makita og panginabuhi sa mga molupyo sa ilang lungsod. Kini sama sa mga produkto sa mais, saging, lubi, mangga, mga utanon ug uban pang lagutmon nga makita sa lungsod sa Barili.

Matud ni Marinyas mas bongga ang ikaupat ka tuig nga Kaumahan Festival nila karung tuiga tungod sa mga lokal ug langyaw’ng turista nga mipadayag na og interes pagsaksi atol sa pagpahigayun unya sa maong festival.

Nahukman nila ang pagpili sa Kaumahan Festival aron pagdasig sa mga mag-uuma sa ilang lungsod ug pag-promote sa ilang mga produkto sa tibuok Sugbo.

Dugang sa mayor nga pagkakarun andam na ang tanan alang sa mao nilang kalihukan ug karon ang ilang gihimo mao nalang ang pag- finalize sa ubang mga dinapit nga opisyal apil na ang pipila nga naggikan sa nasudnong kagamhanan. (BANAT NEWS)