Tulisan kulatado sa mga estambay

CEBU, Philippines - Nakaangkon og bun-og sa lawas ang usa ka suspetsadong tulisan kinsa giingong mituok sa iyang biktima human siya tabangi og kulata sa mga estambay kagahapon sa buntag diha sa national highway sa barangay Lawaan II, dakbayan sa Talisay.

Ang biktima mao si Eliza Sarausad, 47, taga sitio San Isidro, barangay Perilos, dakbayan sa Carcar samtang ang nakulatahan sa mga tawo mao si Ian de Gracia Labajo, 31, taga sitio Camp 2, barangay Jaclupan, dakbayan sa Talisay.

Si PO3 Mikie Espina kinsa usa sa mga miresponde sa maong insidente sa pakighinabi niini sa Banat News mibutyag nga si Labajo ug Sarausad misakay og multicab nga pasaheroan gikan diha sa Rotonda, Carcar.

Apan pag-abot nila diha sa lugar nga nahitaboan kalit nga gilabni ni Labajo ang shoulder bag sa biktima nga dunay sulod nga ladies wallet nga dunay sulod nga P1,300 nga kwarta, usa ka 1211 Nokia cellphone balor og P1,400, usa ka pouch nga dunay sensilyo nga P20.

Si Sarausad misuway sa pagsukol ngadto kang Labajo hinungdan nga gituok siya sa suspetsado. Apan ang biktima misinggit pagpangayo og panabang hinungdan nga ang mga estambay daling miduol sa sakyanan ug gitabangan og kulata si Labajo.

Na-recover sa mga polis gikan kang Labajo ang usa ka pouch nga dunay sulod nga improvised tube burner ug plastic tooter nga pulos gamiton sa paghingos og shabu.

Si Labajo nagtingkagol sa Talisay City detention cell ug gikatakdang pasakaan kagahapon og tukmang kaso sa iyang nahimong kalapasan diha sa piskaliya sa dakbayan sa Talisay.  - BANAT NEWS