200 ka polis may budget na

CEBU, Philippines - Gipadayag ni Major Romeo Cordova, chairman sa Police Coordinating and Advisory Council (PCAC) nga adunay igong budget ang siyudad sa Sugbo kung maabot na dinhi ang 200 ka mga polis nga idugang sa puwersa sa Cebu City Police Office.

Si Cordova kinsa wala pa mobutyag kun unsang petsaha moabot ang maong mga polis miingon nga gikinahanglan kaayo kining maong puwersa kay dako kaayo kini og ikatabang sa pagmentenar sa kahusay ug kalinaw sa dakbayan.

Sayo niini nabalita dinhi sa Banat News ang mensahe ni Chief Supt. Ager Ontog Jr. , hepe sa Police Regional Office (PRO)7 nga dugangan og 200 ka sakop ang CCPO gumikan sa kadako sa area nga gialagaran niini.

Nagkanayon si Cordova dinhi sa Banat News kagahapon nga iya na nga nahisgotan ang maong kalamboan ngadto sa Budget Office sa City Hall ug giingong dili gyud magmakuli ang siyudad sa paghatag og pundo kung hisgotan na ang mga programa alang sa kahusay ug kalinaw.

Sa pagkakaron nagpadayon gihapon ang P2 mil nga allowance nga gidawat matag buwan sa kapin sa 800 ka mga polis sa siyudad sa Sugbo ug kung maabot na ang dugang 200 nga polis, madugangan ang maong gahin   og P400,000.

“Nindot gyud nang butanga kung maabot na ang dugang 200 ka polis, kay mosamot pa gyud kaminos ang krimen sa atong lugar. Kung daghang polis sa kadalanan, mahadlok na ang mga tawo nga mobuhat og krimen,” matud pa ni Cordova.

Gipasabot ni Cordova nga makatabang kaayo sa usa ka dapit kung adunay “police visibility” ilabi na sa mga dagkong siyudad sama sa dakbayan sa Sugbo.

Nasayran nga ang dugang polis nga idestino sa CCPO maggikan sa Regional Public Safety Battalion (RPSB) ug gipaubos kini karon sa higpit nga pagbansay.  - BANAT NEWS