Naghikog sa CPDRC

CEBU, Philippines - Usa ka piniriso nga gibartolina napalgang patay ug giingong naghikog kini sumala pa sa mga awtoridad sa Cebu Provincial Detention and Rehabilitation Center (CPDRC) niadtong Domingo sa hapon.

Apan ang pamilya sa namatay nga si Ricky Salidaga, 30, nagduda niini tungod sa mga nadunggang mga ‘tabi-tabi’ gikan sa maong bilanggoan nga ‘gitakal’ (kulata gamit ang goma nga latigo) kini una gibartolina.

Si Salidaga, 30, nga taga dalan Martires sa barangay Tejero sa dakbayan sa Sugbu ug nasulod sa CPDRC niadtong Disyembre tungod sa kasong robbery napalgang nagbitay nga may higot nga habol sa iyang liog nga ang pikas tumoy gihigot sa rehas ug patay na kining miabot sa Vicente Sotto Memorial Medical Center (VSMMC).

Si Alger Comendador, jailwarden sa CPDRC misaysay nga sayo nianang buntag sa Domingo si Salidaga nagpunay og bugal-bugal sa mga mibisitang paryente sa ubang mga bilanggo ug pagkahapon nag-amok ug nagsiyagit-siyagit sa mga bisita.

Aron ilikay sa kagubot ilaha kining gibutang sa “bartolina” pasado alas-3 sa hapon apan si PG1 George Libradilla nga naghatud og panihapon niini maoy nakadiskubreng nagbitay na kini. Giklaro ni Comendador nga walay nahitabong pagpamun-og kang Salidaga tungod kay usa kini sa girespetuhang piniriso sa iyang brigada

Si Comendador nakasumiter na og report ngadto kang Cesar Veloso ang consultant on security matters sa Kapitolyo kalabot sa kamatayon ni Salidaga.

Ang apohan ni Salidaga nga si Inday Antone,70, nakadawat na nga namatay kini pinaagi sa paghikog apan tungod sa mga nadunggan niyang gidagmalan kini buot niyang adunay imbestigasyon nga himuon ang CPDRC.

Si Atty. Jose Maria Gastardo, Provincial Capitol consultant nagkanayon ila pang paaboton ang resulta sa awtopsiya sa PNP Crime Laboratory sa dili pa nila morekomendar og laing lakang.

Apan sa awtopsiya ni Chief Insp. Joe Martin Fuentes sa PNP Crime Laboratory-7 mibutyag nga ang lama ra sa inagian sa pagkabitik sa atubangang bahin sa liog ang gikamatyan ni Salidaga.

Walay laing nakit-ang bun-og sa lawas niini. “Namumulupot ang neck niya. He died of asphyxia, example congested ang kanyang trachea, medyo namamaga pati ang kanyang larynx at lungs. It is because of lack of oxygen na pupunta sana sa tissue dahil may bumara,” matud pang Fuentes. (BANAT NEWS)