Tanod gikan nag-duty gipusil patay, bangi sa yuta gisusi sa kapolisan

CEBU, Philippines -  Patay ang usa ka barangay tanod nga gipusil sa wala hiilhing mga lalaking nagsakay og motorsiklo alas-11 pasado ang takna sa gabii sa dalan A. del Rosario, barangay Guizo, dakbayan sa Mandaue.

Ang biktima mao si Rodulfo Seno, 74, taga Sesame Street sa maong barangay. Duha ka wala mailhing mga lalaking luwan sa itom nga XRM nga motorsiklo nagsul-ob og itom nga jacket ug pulos nag-helmet ang giingong mipatay sa biktima.

Ang biktima gikan pa sa iyang duty pagbantay sa dalan M.C. Briones sa barangay Guizo sa maong dakbayan ug nag-inusarang naglakaw pauli sa ilang panimalay dihang gisugat ug gipusil sa mga mamumuno.

Gituohang giatangan nang daan sa mga mamumuno ang biktima diha sa eskina Sesame Street ug dalan A. del Rosario ug gipusil kini sa makadaghang higayon ug daling nangikyas pahilayo sa maong dapit.

Dali nga gidala ang biktima sa Mandaue City District Hospital apan pipila ka mga oras sa pag-atiman sa mga doktor namatay kini.

Si Insp. Ramil Morpus sa Homicide Section nagkanayon nga testigo kaniadto si Seno sa LBC robbery. Apan ilaha usab gisubay ang giingong land dispute sa maong kaso labot sa kayutaan sa pamilya.

Si Guizo Barangay Kapitan Arnold Capacite nga nahinabi sa Banat News miingon nga nagtuo siya nga walay kalambigitan sa iyang pagkatanod ang maong pagpusil patay sa biktima. (BANAT NEWS)