CEBU, Philippines - Gitutukan karon sa kapolisan sa dakbayan sa Mandaue ang barangay Mantuyong ug barangay Jagobiao tungod kay mao kini karon ang gihugpaan og ilegal nga drugas.
Kini subay usab sa ilang rekord nga daghang pag-aresto o mga nadakpang mga drug personalities gikan sa maong barangay sa mga nanglabay’ng mga operasyon.
Si Senior Superintendent Noel Gillamac, direktor sa Mandaue City Police Office (MCPO) nga nahinabi sa Banat News kagahapon mibutyag nga kaniadto pa nabaniog ang maong mga barangay gumikan sa ilegal nga drugas.
Hinuon nagbunga na ang ilang mga gihimong operasyon batok sa mga drug personalities sa maong mga barangay ug maisip nga nakontrolar na nila pagkatap pa niini human mangadakpi ang mga notadong drug pushers sa maong mga dapit.
Matud pa ni Gillamac nga epektibo kaayo ang gisagop nilang paagi sa pagpangdakop sa mga pushers sa dakbayan tungod kay ang mga polis nga gikan sa laing presinto iyang gitugotang makapanakop sa mga dapit nga di sakop sa ilang presinto.
Kini ang hinungdan nga daghan sa mga pusher og shabu sa barangay Mantuyong, barangay Jagobiao, barangay Umapad ug barangay Opao ang nangadakpan sa mga polis nga wala madestino sa ilang mga dapit. (BANAT NEWS)