Newsboy nga milugos sa anak sa amo sikop

CEBU, Philippines - Nadakpan sa kapulisan ang usa ka newsboy nga kapin sa tuig nang nagtago-tago human kini pasanginling miunay og lugos sa 13-anyos nga anak sa iyang amo niadtong miaging tuig.

Ang suspek nga si Ivan Sipalay, 21, nadakpan sa kapulisan diha sa barangay Sayaw sa lungsod sa Barili niadtong Huwebes sa alas 5:00 sa hapon. Ang nadakpan kanhi newsboy sa dakbayan sa Sugbo nga gipasanginlang milugos sa anak sa agalong news dealer.

Matud ni SPO2 Zaldy Orello sa Barili Police Station dihang nahinabi sa Banat News ang suspek gidakop sa kapulisan sa dakbayan sa Sugbo inabagan sa kapulisan sa Barili subay sa warrant of arrest nga giluwatan ni Regional Trial Court (RTC) branch 20 judge Bienvenido Saniel sa kasong pagpanglugos.

Ang inahan sa biktima nga gitago lang ang pangalan mitug-an sa kapulisan nga ang suspek ilahang sinaligan kaniadto gumikan kay kapin sa tuig na kining nagtrabaho kanila.

Apan nahugno ang ilang pagsalig dihang nahibilin ang suspek ug ang ilang 13-anyos nga anak sa ilang balay ug diha gihimo sa suspek ang pagpangabuso.

Wala dayun madakpi ang suspek gumikan kay human sa hitabu misibat kini paingon sa Leyte ug dihang namingaw-mingaw na mipauli kini sa lungsod sa Barili.  (BANAT NEWS)