CEBU, Philippines - Si Kong. Manny “Pacman” Pacquiao mopahigayon og konsiyerto sa subhang Hoops Dome sa barangay Gun-ob nunot sa ika-50 nga anibersaryo sa pagka-dakbayan sa Lapulapu karong gabii.
Matud pa ni Lapulapu City Mayor Paz Radaza nga ang modernong Hoops Dome pormal nga subhan karong buntag ug sundan kini sa konsiyerto ni Pacman karong gabii.
Ang Hoops Dome gisugdan pagpabarog niadtong Disyembre 2008 nga gigastuhan og P192 milyones nga hinuwaman sa Land Bank of the Philippines ug adunay kapasidad gikan sa 4 ngadto 5 mil ka tawo ug fully air conditioned.
Gikalipay og dako ni Radaza ang pagsanong ni eight weight division champion ug Sarangani Cong. Manny Pacquiao uban sa iyang kaugalingong banda ang “MP” Band nga usa sa maghatag og alegre sa mga Oponganons lakip sa usa ka tuig niining pagsaulog sa ika-50 nga anibersaryo.
Butangan usab og dakong screen sa gawas nga bahin aron makita sa mga tawong dili makasulod ang maong konsiyerto. (BANAT NEWS)