CEBU, Philippines - Moabot sa P28 mil nga koleksiyon ang nasakiyo sa duha ka nagtaptap nga tulisan human nga mitulis sa ahente og beer dihang naningil kini sa mga kustomer sa barangay Gaas sa lungsod sa Balamban niadtong Miyerkules sa alas 3:34 sa hapon.
Ang biktima mao si Lawrence Lauron, 29, molupyo sa Mambaling siyudad sa Sugbo ug sales agent sa Asia Brewery, samtang padayon pang nag-imbestigar ang kapolisan sa duha ka mga tulisan nga pulos nagtaptap sa ilang nawong sakay og motorsiklo nga kolor itom nga walay plate number.
Matod ni PO3 Julius Obanana sa Balamban Police Station dihang nahinabi sa Banat News miingon nga ang biktima gikan naningil sa gihatud nga beer sa tindahan nga gipanag-iya ni Alice Manaytay sa maong lugar.
Apan dihang paingon na unta kining mosakay sa sakyanan niini kalit siyang gihunongan sa mga tulisan ug ang angkas mition og armas nga kalibre .45 ug mimando sa paghatag sa gibitbit niyang bag nga gisudlan sa iyang koleksiyon nga moabot og P28 mil. Walay nahimo ang biktima gawas sa paghatag sa bag ug dayung sibat ang mga suspek sakay sa ilang service nga motorsiklo ug ang biktima sama sa naandan igo nalang sa pagpa- blotter sa buhatan sa kapulisan. - BANAT NEWS