CEBU, Philippines - Gikatakdang moabot karong adlawa si Presidente Benigno Aquino III alang sa pormal nga inugurasyon sa 2X100 MW nga generator unit sa KEPCO-SPC Power Corporation's Cebu Power Plant sa barangay Colon sa Naga City.
Si Fayette Riñen sa Philippine Information Agency-VII nagkanayon nga si Aquino gipaabot nga moabot sa Mactan Ebuen Air Base pasado alas-9:30 sa buntag ug modiretso og sakay sa usa ka chopper padulong sa planta sa Kepco.
Giingong molanat lang og duha ka oras ang pag-adto sa pangulo sa maong planta ug mobiya na kini balik sa kaulohan.
Si Department of Energy Secretary Rene Almendras mao ray bugtong miyembro sa gabinete ni Aquino nga mokuyog sa maong inugurasyon apan gituohang adunay mga lokal nga opisyal sa Sugbu ang motambong. Ang KEPCO-SPC namahayag nga ang inugurasyon maoy magkompleto sa ilang pasilidad nga makatabang sa pagsulbad sa problema sa kakulang sa kuryente sa Visayas aron magpadayon ang rehiyon sa kalamboan.
Ang maong planta natukod pinaagi sa paghiusa sa KEPCO Philippines ug SPC Power Corporation ug gisugdan kini paghimo niadtong Pebrero 2008. Niadtong Pebrero 28, 2011 unang nakabaligya ang 100MW unit og suplay sa kuryente sa power distributors ug nasundan kini sa laing 100 MW unit niadtong Mayo 31,2011. (BANAT NEWS)