Rama midawat sa desisyon sa konseho
CEBU, Philippines - Gidawat ni Mayor Michael Rama ang desisyon sa konseho sa siyudad nga dili angay himoong consultant si Oliver Echivarre gumikan kay usa kini ka US citizen.
Matud pa sa mayor nga respitohan niya ang desisyon sa konseho ug wala siya’y plano nga moapela niini.
Kahinumdoman nga gikuha ni Rama si Echivarre isip consulant sa “system and procedures”.
Usa ka retired US Air Force si Echivarre kinsa usa sa mikooperar sa beautification project sa siyudad.
Nahimong init karon nga isyu ang pagkuha og consultant sa siyudad ilabi na nga nagkalain-lain ang desisyon sa executive ug legislative department sa City hall sa pag-hire og consultant.
Una na nga gipadayag sa legal office nga adunay gahom ang usa ka mayor sa pagtudlo og consultant sa siyudad.
Apan matud pa sa tsirman sa committee on laws, ordinances and public accountability sa konseho nga si Konsehal Edgardo Labella nga dili puwede mahimong consultant sa usa ka local government unit sa Pilipinas kung dili kini Filipino citizen.
Busa kay si Echivarre usa man ka langyaw dili siya kalipikado sa maong posisyon, matud pa ni Labella. (BANAT NEWS)
- Latest
- Trending
