Pag-ayo sa mga kanal ug sapa gahinan og pundo

CEBU, Philippines -  Gipahibalo ni Mayor Michael Rama nga nakaalerto karon ang siyudad sa sunod-sunod nga pag-uwan hinungdan nga dunay mga nagkadaiyang kadalanan ang gibaha sa miaging adlaw.

Matud pa sa mayor nga subsob nga pagpalawom sa mga sapa ug kanal nga maoy usa sa mga solusyon aron mamenusan ang pag-awas sa tubig baha panahon sa ting-uwan.

Niadtong milabay’ng Biyernes, gilunopan ang downtown area ug adunay mga department stores ug mga establisamento ang gisudlan sa tubig tungod sa pag-uwan, samtang ang kadalanan dili maagian hinungdan sa pagkatanggong sa mga tawo.

Nunot niini, si Rama mohingusog nga maapil sa supplemental budget no.2 sa dakbayan ang proyekto alang sa pagpalawom sa mga kanal ug sapa.

Panawagan usab niya sa mga tawo ilabi na kadtong duol sa mga sapa nga mabinantayon kanunay ug kinihanglan nga mobakwit gyud dayon sa higayon nga modako ang tubig.

Gimandoan na usab niya ang Cebu City Disaster Risk Reduction and Management Council (CCDRRMC) nga gipangulohan ni Alvin Santillan nga i-monitor ang mga dapit sama sa mga sapa, kanal, kabukiran nga kuyaw sa landslide ug uban pang mga lugar nga nahimutang sa peligro panahon sa uwan.

Samtang ang weather forecaster sa Philippine Atmospheric Geophysical and Astronomical Services Administration (PAG-ASA) nga si Ella Comahig mitaho dinhi sa Banat News nga wala nag-atubang og hulga sa bagyo ang Sugbo.

Matud pa niya nga ang uwan nga nasinati sa Sugbuanon resulta sa hanging habagat. Gipaabot usab niyang molungtad pa hangtud sa Septiyembre ang nasinating pag-ulan tungod kay panahon karon sa ting-ulan.( /EIM) (BANAT NEWS)