CEBU, Philippines - Usa ka Indian national ang nabiktima sa pagpanulis ug giilogan sa iyang motorsiklo sa duha ka mga wala mailhing tulisan niadtong Miyerkules sa alas 7:00 sa gabii sa barangay Lawaan III, dakbayan sa Talisay.
Ang biktima mao si Jetinder Thakur, 30, tigpatanto og kwarta, temporaryong nagpuyo diha sa barangay Linao sa nahisgutang siyudad mi-report diha sa Talisay City Police Station mga alas 10:00 na sa gabii.
Si PO3 Mikie Espina, PO2 Stephen Sefuesca ug PO2 Roy Lofranco daling miresponde sa maong report apan wala na nila masakpi ang mga tulisan.
Nakuha sa mga tulisan gikan kang Thakur ang P3,000 nga kwarta nga iyang kinolekta gikan sa iyang mga kliyente, cherry mobile phone, ug ang iyang Honda nga motorsiklo nga kolor blue nagtangag sa plakang GJ-5910.
Si Lofranco sa pakighinabi niini sa Banat News kagahapon mibutyag nga sa wala pa mahitabo ang insidente si Thakur naningil kini sa mga nakahuwam kaniya og kwarta diha sa lugar.
Dihang mibalik si Thakur sa iyang motorsiklo nga giparada diha sa daplin sa karsada kalit lang siyang gitiunan og pusil sa duha kinsa nag-atang nang daan kaniya.
Gibana-banang ang nahisgutang mga tulisan nagpanuigon sa 20-anyos ug matud usab ni Lofranco nga kanunay nga makita ni Thakur ang duha diha sa barangay Tabunok matag paningil niini sa mga nakahuwam kaniya.
Gituohan sa kapolisan nga si Thakur taud-taud na kining gipanid-an sa maong mga tulisan. - BANAT NEWS