Cuenco interesadong modagan sa 2013

CEBU, Philippines - Giingong interesado magpapili pagbalik si kanhi Kongresista sa habagatang distrito sa siyudad sa Sugbo nga si Antonio Cuenco sa kahni niya gihuptan nga posisyon sa umaabot nga piniliay sa 2013.

Matud pa sa usa ka tinubdan sa Banat News nga matapos na ang termino ni Cuenco isip Secretary-General sa Inter-Parliamentary Assembly karong 2013 bukas na siya sa pagbalik sa kalibutan sa politika.

Nasayran usab nga dili manginlabot si Cuenco sa kasungian karon tali nila ni Kongresista Tomas Osmeña ug kanhi niya kauban sa Bando Osmeña Pundok Kauswagan nga si Mayor Michael Rama ug andam kini mahimong tulay aron magkauli ang duha ka kampo.

Samtang ang kapitan sa Poblacion Pardo nga si Fermin Dasmariñas miangkon nga nakauban niya ang kanhi kongresista sa usa ka panihapon uban sa laing unom ka mga kapitan sa miaging adlaw. 

“Niana raman siya (Cuenco) nga andam siya modagan mobalik pagka-congressman kung tanyagan siya ni Kogresista Osmeña,” matud pa ni Dasmariñas kinsa kaalyado usab sa BOPK.

Aminado hinuon ang kapitan nga layo pa kaayo ang sunod nga eleksyon ug posible nga dunay kalit nga mga kausaban busa dili pa siya kahatag og lapad nga komento niini.

Samtang ang kapitan sa barangay Labangon nga si Victor Buendia kinsa kaalyado usab sa BOPK mipadayag nga kung siya ang pasultion, angayan tagaan og tsansa ang ubang mga politiko.

“Duna naman siya’y napakita nga mga maayong programa, seguro igo na tingali na ug ihatag napud sa ubang tawo ang maong posisyon,” sumala pa ni Buendia.  - BANAT NEWS