CEBU, Philippines - Giklaro ni Acting Mayor Joy Augustus Young nga dili politika ang gihisgutan sa nahitabong tigom sa mga konsehales sa siyudad didto sa panimalay ni Kongresista Tomas Osmeña sa barangay Guadalupe niadtong Domingo sa gabii.
Gawas sa mga konsehal, mitambong usab sa maong tigom si North District Rep. Rachel ‘Cutie’ del Mar uban sa iyang amahan nga si kanhi Kongresista Raul del Mar ug kanhi usab kongresista sa South District nga si Antonio Cuenco.
Nagkanayon si Young nga igo lang miesplikar si Osmeña sa iyang panglantaw kalabot sa Ciudad Project nga hagbay ra nga giduol sa provincial government. Sama kang Osmeña, supak usab si Young sa maong proyekto gumikan sa pagtuong makapagrabe kini sa kahuot sa dagan sa trapiko sa mga dalan palibot niini. Ang maong giduso nga proyekto nahimutang sa barangay Apas buyon sa Gov. M. Cuenco Ave. nga maoy nagkonektar sa dalan sa Banilad ug Talamban area.
Kahinumduman nga miuyon si Mayor Michael Rama sa maong proyekto butang nga wala mauyoni ni Osmeña sanglit proyekto man kini sa kaaway niya sa politika nga si Gobernador Gwendolyn Garcia.
Wala katambong sa maong tigom si Konsehal Nida Cabrera gumikan kay milarga kini didto sa Amerika ug ang pag-umangkon sa mayor nga si Konsehal Eduardo Rama wala imbitara sa maong tigom gumikan kay tataw nga naa kini sa panig sa mayor.
Subli usab nga giyagyag ni Osmeña nga dili siya uyon nga ibaligya karong panahona ang mga luna sa South Road Properties gumikan kay kinahanglan nga paabuton una nila nga modako ang value niini. (BANAT NEWS)