Managsuon giluba tungod sa hantak usa ang patay

CEBU, Philippines - Usa ang patay ug laing usa ang angol human dunggaba tungod sa bangi sa hantak niadtong Sabado sa hapon diha sa sitio Sambagan, barangay Tabunok, dakbayan sa Talisay.

Ang mga biktima mao ang magsuong Rachelles Parba, 40 ug Michael Parba, 49, parehong mga residente sa sitio Pang-pang, barangay San Isidro, dakbayan sa Talisay.

Ang suspetsado mao si Elmo Largo, 29, taga barangay Pooc sa nahisgutang dakbayan nagtingkagol karon sa Talisay City detention cell human masikop sa mga estambay ug mga tanod.

Base sa imbestigasyon sa grupo ni Insp. Hugo Rio Ipong sa Talisay City Police Station nga sa wala pa mahitabo ang pagpanunggab si Rachelles ug Largo parehong mga hubog nagduwa og hantak.

Ang duha nagkalalis human giingong gibaraw ni Largo ang antog hinungdan nga gisagpa kini ni Rachelles. Human niini mipauli si Largo apan pila ka minutos ang milabay mibalik nga duna nay bitbit nga kutsilyo ug gihansakan si Rachelles.   

Si Rachelles nakaangkon og samad dinunggaban sa tuong bahin sa iyang dughan daling gidala ngadto sa Talisay City District Hospital apan mga kapin sa usa ka oras nakabsan kini sa kinabuhi.

Giapil og dunggab ni Largo si Michael apan nasagang kini hinungdan nga nasamad ang tuong kamot sa naulahi. Human sa pagpanunggab nadakpan sa mga estambay si Largo.

Na-recover sa mga tanod gikan ni Largo ang kutsilyo nga dunay gitas-on nga 12-pulgada ug gitugyan ngadto sa mga polis nga miresponde. - BANAT NEWS