Komitiba sa finance gikuptan na ni Margot O.
CEBU, Philippines - Gipahibalo ni Bise Mayor Joy Augustus Young nga si Konsehal Margarita Osmeña na gyud maoy mangulo sa committee on budget and finance sa konseho sa siyudad sa Sugbo sugod karong Hulyo 1 atol sa inaugural session.
Kini maoy gipahibalo ni Young atol sa 2nd General Assembly of the Association of Barangay Council nga gipahigayon kagahapon sa South Road Properties.
Giklaro usab sa bise mayor nga magpabilin usab sa committee on public service ang pag-umangkon ni Mayor Michael Rama nga si Konsehal Eduardo Rama.
Sumala pa ni Young mga kugihan si Konsehal Rama ilabi na sa kampanya niini sa pag-segregate sa basura uban ni Konsehal Nida Cabrera busa magpabilin sila sa ilang mga komitiba.
Ang konseho karon solidong sakop sa Bando Osmeña Pundok Kauswagan nga kaniadto gipangulohan ni Mayor Rama sa dihang bise mayor pa kini apan usa ka semana na ang nakalabay mibiya kini sa maong partido.
Samtang si Konsehal Osmeña mipadayag nga iyang dawaton ang tanyag sa konseho gumikan kay gipasaligan siya sa iyang mga kauban nga suportahan siya sa iyang huptan nga komitiba.
Si Margot nakatrabaho na kaniadto isip bank manager didto sa Los Angeles, California, USA. (BANAT NEWS)
- Latest
- Trending
