Konsehal sa Barili gikiha sa mayor

CEBU, Philippines -  Gipaubos karon sa imbistigasyon sa Department of Environment and Natural Resources (DENR) ang usa ka konsehal ug kanhi opisyal sa barangay ug ang chainsaw operator sa lungsod sa Barili tungod sa illegal nga pagpamutol sa mga punoan sa gemilina sa palibot sa iyang balay-lungsod.

Ang gipasakaan og kaso nga illegal cutting of trees nga kalapasan sa Akta Republika R.A. 3571 ug P.D. 953 mao si konsehal Hector “Tito” Celis sa barangay Azucena, Edwin Orosco, kanhi opisyal sa barangay Cabcaban ug ang chainsaw operator nga ginganlan lang og John dou.

Si Mayor Terisito Mariñas sa maong lungsod mao mismo ang kihante nga misang-at sa kaso didto sa buhatan sa DENR sa dakbayan sa Toledo sa miaging buwan, gumikan sa kapakyas sa nahisgotang konsehal ug sa duha niini ka sakop nga mao ang kanhi opisyal sa barangay ug gabasero dihang gihabas nila ang duha ka dagkung punoan sa gemilina nga nahimutang sa luyong bahin sa legislative building sa lungsod niadtong Pebrero 15, 2011.

Ang librarian sa lungsod nga si Florencia Ngabngaben ug ang Information Officer nga si Felomino Leyson maoy miduso og affidavit isip maoy saksi sa kabalido sa kiha batok sa konsehal ug sa duha ka sakop niini.

Lakip sa mga ebidensiya nga gisumiter sa kampo ni Mayor Mariñas nga magpalig-on sa maong kaso mao ang hulagway sa mga pinutol nga dagkung kahoy sa gemilina, affidavit sa duha ka mga saksi ug ingon man ang police blotter sa maong panghitabo.

Giklaro sa mayor sa iyang kiha nga gawas nga wala mananghid ang konsehal ug mga kaubanan niini sa pagpamutol sa maong mga punoan sa gemilina wala pa gyud marehistro sa DENR ang gigamit nga chainsaw sa pagputol sa maong mga kahoy.

Gisuwayan   sa pagkontak ning tigbalita si Konsehal Celis sa lungsod sa Barili aron pagkuha sa habig niya apan wala kini sa buhatan sa konseho kagahapon sa buntag. (BANAT NEWS)