Upat ka tulisan nadakpan sa kapolisan

CEBU, Philippines - Upat ka suspetsadong tulisan kinsa gitumbok nga maoy responsabli sa sunodsunod sa pagpanulis sa mga ahente og softdrinks ug beer sa probinsya sukad pa niadtong bulan sa Marso hangtud karong semanaha nadakpan sa hiniusang operasyon sa kapulisan sa dakbayan sa Talisay ug Toledo didto sa ilang hide-out sa barangay Pangdan dakbayan sa Naga sa miaging hapon.

Ang mga nadakpan mao sila si Rommel Guimiala Adaro; Jordan Katamisan Bariut; Jomar Conde Placencia; pulos nagpangidaron 21, ug Joseph Montes Lawas, 33, minyo, nga mga lumad nga taga Polanco, Zamboanga Del Norte;, Pangdan, Naga; Tinubdan, Daanbantayan; ug Cabungahan sa dakbayan sa Danao ang usag-usa.

Ang hiniusang operasyon sa kapolisan gipangulohan ni Chief Insp. Jovito Canlapan, hepe sa Toledo City Police Station.

Nasayran gikan sa kapolisan nga ang mga suspetsado ilang naabtan nga nangatulog sa ilang hide-out nga payag sa barangay Pangdan. Kini human pusila ni Adaro si Edward Lagsik Abao, nga taga Misamis Oriental nga ila ra usab nga kauban niadtong Hunyo 1, 2011 sa alas 9:00 sa gabii..

Nasakmit sa kapolisan gikan sa mga suspetsado ang duha ka PC Model Remington .45 cal. Pistol, adunay unom ka buhing bala, duha ka 357 sturn ruger revolver nga may tag- upat ka buhing bala, usa ka XRM kolor pula nga motor kinsa gidudahang kinawat sa mga suspetsado.

Si Canlapan nga nahinabi sa The Freeman igsuong pamantalaan sa Banat News mitug-an nga niadtong Miyerkules sa hapon nagplano sila si Adaro, Bariut ug Placencia nga ilang tulison ang Lotto outlet sa Poblacion, Naga.

Apan sa ilang pag-abot nanirado na ang lotohan hinungdan nga ila nalang gitulis ang pasahero sa multicab nga nakuhaan nila og P300. Nasayran ni Canlapan nga si Edward nagduwa sa iyang armas sa ilang hide-out dihang napusilan kini ni Adaro sa tiyan.

Nangita sila og hospital ug naabot sila sa dakbayan saToledo.

Matud ni Canlapan nga si Abao didto nila dad-a sa barangay Matab-ang sa balay sa kapuyo ni Lawas ug giilisan kini og t-shirt   tungod sa kadaghang dugo agi sa bala ug gidala nila ngadto sa Toledo District Hospital

Ang nurse nga miatiman ni Abao maoy nanawag sa police station ug nagpahibalong adunay nalandig sa ilang tambalanan nga napusilan. Si Abao gidala ni Lawas sa Vicente Sotto Memorial Medical Center (VSMMC) sa dakbayan sa Sugbo.

Sa gihimong pakisusi sa kapolisan mitumaw ang ilang pagduda hinungdan nga ilahang gi-hold si Lawas kinsa nangangkong usa siya ka magsisibya sa Channel 54 ug iya rang naagian si Abao niadtong higayona daplin sa dalan nga sa tan-aw niya naglisud na sa pagginhawa ug dunay samad pinusilan hinungdan nga iyang gipasakay sa iyang motorsiklo ug gihatud sa tambalanan.

Matud ni Canlapan sa tanto niyang pagsukit-suki kang Lawas kini mitug-an nga duna siya’y mga kauban didto sa barangay Pangdan, Naga nga kauban niya sa panulis sa mga dakbayan sa Sugbo, Mandaue, Toledo ug lungsod sa Balamban.   - (BANAT NEWS)