CEBU, Philippines - Himuong makasaysayanon ug di makalimtan ang pagsaulog sa ika- 50 nga Golden Anniversary sa pagka dakbayan sa Lapulapu sa umaabot Hunyo 17 ning tuiga.
Matud pa ni Lapulapu City Mayor Paz Radaza ang maong selebrasyon angayan nga himuong makasaysayanon gumikan sa mga kabag-ohan nga nahitabo sa dakbayan.
Sa milabay’ng Hunyo 17, 1961 nahimong dakbayan ang Lapulapu pinaagi sa usa ka charter niini, niadtong 2007 nahimong highly urbanized city ang dakbayan ug sa milabay’ng tuig 2009 nahimong Lone District.
Si Kon. Harry “Don” Radaza nga maoy gitahasan sa paghimo sa maong selebrasyon mipadayag nga adunay kapin P1 milyon nga igahin alang sa maong selebrasyon.
Samtang ang tanang 19 ka barangay sa mainland Lapulapu gihatagan og gahin alang sa ilang mga kalihukan sama sa disko, parlor games ug fireworks display atol unya sa selebrasyon sa petsa 17 ning tuiga.
Si Mayor Radaza mohatag sa iyang mensahe pinaagi sa usa ka estasyon sa AM radio diin idungan usab kini og sibya sa tanang disco mobile units sa 19 ka barangay.
Gitinguha usab sa dakbayan ang 30-minutong fireworks display nga anha himuon sa tunga nga bahin sa duha ka makasaysayanong Mandaue-Mactan Bridge ug Marcelo Fernan Bridge.
Dugang pa niini ang mga indigay sa Arko sa matag barangay nga kinahanglang adunay kalambigitan sa ika-50 anibersaryo sa dakbayan ug kinahanglang ginama kini sa mga “indigenous ug recyclable materials.” (EIM)(BANAT NEWS)